ادم وعمايله

اسفة لانى تأخرت فى الكتابة بس دة لظروف سعيدة جدا ... انا اشتغلت يا منز

الحمد لله بعد طول بحث عن وظيفة اخيرا ربنا وفقنى فى شغلانة كويسة اوى مع ناس طيبين ومحترمين والحمد لله رب العالمين
بس يشاء ربنا انه فى نفس الاسبوع اللى اشتغل فيه ، ادم بسيب شغله ويقعد فى البيت
شفته حظ اكتر من كدة

تعالوا بئا احكيلكوا عن رد فعل سى ادم عن شغلى

اولا انا بشتغل من 9 الى 5 بس عشان الشوارع فاضية والمواصلات سهلة ففى الحقيقة انا بشتغل من 7:30 الى 6:30
يعنى تقريبا 11 ساعة برة البيت
قوم بئا لما اروح ايه اللى يحصل ... الاقى سى ادم مش طايق انى رجعت و يقولى هما بيمشوكى بدرى كدة ليه ؟
وكلام كدة من اللى بجد يبان صغير لكن بجد هو جارح جدا ويضايق
وبيعمل ايه كمان سى ادم
يقعد طول اليوم فى البيت ، و ييجى قرب ميعاد مرواحى يخترع اى مشوار عشان ارجع وهو مش موجود ، ويفضل برة لغاية قرب ميعاد نومى . يعنى تقريبا من يوم ما اشتغلت ماشفتوش ساعتين على بعضهم

دة غير العصبية والنرفزة والاسلوب الوحش

انا عارفة ان الحالة اللى هو فيها دى سببها انه بطل شغل ، ولسوء الحظ كمان ان دة يحصل فى نفس الوقت اللى انا اشتغلت فيه
بس انا ايه ذنبى فى النكد والعكننة دى كل يوم
بجد ادم ضيع على فرحة الشغل الجديد
وانا اصلا لسة جديدة والمفروض اثبت نفسى
بس بسبب الجو اللى هو عامله انا لا عارفة انام ولا عارفة اركز ولا لى نفس اعمل اى حاجة
يعنى دة يرضيكم برضه
انا لما كنت قاعدة وهو بيشتغل ، وكان بجد ساعات الشغل بتاعته مبالغ فيها جدا بمعنى انه كان فعلا بييجى البيت عشان ينام وبس
انا برضه كنت بعامله كويس وكنت مريحاه
دلوقتى شوفوا هو بيعمل معايا ايه

طب بلاش دة كله
احكيلكو موقف تانى
يوم 20 مارس المفروض انه كان ليه معزة خاصة عندنا
لان فى اليوم دة يكون فات سنة بالظبط على خطوبتنا
ودى اول مناسبة تعدى علينا والمفروض يكون ليها احتفال خاص . انشالله حتى نتعشى سوا ونقعد مع بعض شوية
وكمان صادف يوم جمعة يعنى اصلا ماوراهوش حاجة
بس اللى حصل ان سى ادم افتكس كدة اى خناقة وعمل مأموص
وفضل واخد جنب لغاية ميعاد الصلاة وبعدين نزل غطس ومارجعش الا بالليل
قمت انا بئا عملت ايه؟
فضلت هـــــــــــــــادية ، ولا الهوا
وكان فى حفلة فى شغلى القديم بمناسبة عيد الام فروحت الحفلة دى وقعدت مع صحابى ، وقعدنا نضحك ونهزر وغيرت جو شوية بدل القرف اللى انا فيه
وبعدين روحت الساعة 9:30
قعدت شوية وبعدين دخلت نمت عشان اصحى بدرى
بس
ولا اديته اهمية
تخيلوا بئا هو عمل ايه؟
تانى يوم الصبح ، لقيته عمال يجر ناعم ، وكلمنى فى الشغل مرتين ، ورجعت البيت لقيته موحود لاول مرة من يوم ما اشتغلت
بجد سبحان الله عليك يا آدم
اما صحيح الرجالة دول عاملين زى طابع البوسطة ، تتفى عليه يلزق

بس انا برضه ماهنش عليا ولما لقيته اخد المبادرة الاولى قمت انا كمان ماكسفتوش وعملتله غدوة معتبرة وكلمته عادى.
والله العظيم انا لو ماكنتش بحبه انا كان جالى الهسهس من زمان