آدم وأم آدم

فى اخت عزيزة كتبت تعليق عن البوست اللى فات وقالت : حاولى تكلميه وتطلبى منه وقت يخصصه للبيت وليكى

بس يا جماعة وقد كان ...

قعدت معاه وحاولت اكلمه وقولت له ان انا فعلا محتاجة وقت لينا سوا ومحتاجة منه يخصص وقت يقضيه فى البيت

بس يا اخوانا وعينكو ما تشوف الا النور

قعد يزعق ويقولى انت مش بتحسى بيا وانانية وعايزانى اسيب شغلى واقعد جنبك

وكلمة منه على كلمة منى

اتقال كلام كتير اوى جارح

ولقينا نفسنا بنقول خلاص طالما مش عارفين نتفق ولا قادرين نريح بعض يبئا خلاص ننفصل بالمعروف

وفعلا بجد دة كان قرار مشترك متفقين عليه واحنا الاتنين مصرين عليه

حلو ؟ حلو

قوم ايه.... كلمنا امه اللى هى حماتى - لان انا ماما متوفية وبابا سنه كبير وصحته تعبانة - عشان تيجى ونتفق على الانفصال عشان خلاص كل واحد يروح لحاله

قوم ايه بئا اللى يحصل ؛ مامته تقعد تسمع منى ايه اللى حصل بالظبط وتسمع منه برضه ايه اللى حصل

وقعدت تيجى ضدى فى صفه شوية وتيجى ضده فى صفى شوية

لحد ما كل واحد طلع اللى جواه وقال كل اللى تعبه من التانى

وبعدين طبعا عارفين ان ليلى فى المواقف دى مش بتتوصى وبتئا الدموع للركب
قامت الست لما لقيتنى بعيط قامت وحضتنى وقعدت اعيط فى حضنها زى البيبى اللى بيعيط فى حضن امه
وسمعت منى لحد ما ارتحت خالص واعصابى هديت
و بعدين اتكلمنا بهدوء كلنا مع بعض وشوفنا ازاى نتقابل فى النص ولاقينا حل وسط يرضينا احنا الاتنين
وماسبتناش غير لما خليته يقوم يبوسنى ويوعدنى ان يوم الجمعة دة بتاعى لوحدى يقضيه كله معايا

ربنا يخليكى ليا ياحماتى يا اللى عوضتينى بجد عن امى