تيجى البنت من دول تموت روحها وتعند مع ابوها وتصر اوى " يا إما ادم يا بلاش " وتعيط اوى وتدبدب برجليها " بحبه يا بابا عااااااااااااا " انا مش عارفة كل دة على ايه يعنى؟
على فكرة بئا يا ليلى يا حبيبتى مش فارقة ادم من عتريس من ابو سويلم
ومش فارقة برضه انتو متجوزين عن حب ولا صالونات
وبرضه مش فارقة كتير انت هتكملى مع حبيبك ولا هتسيبوا بعض
لان فى الاخر كله واحد
ودة مش عن تجربتى انا لوحدى ... دة كل صاحباتى المتجوزين بلا استثناء
كلنا نفس الحالة ونفس الملل
كأننا كلنا متجوزين نفس الراجل
كله بينزل شغله الصبح ييجى بالليل تعبان ومهدود عايز يتعشى ويقعد شوية فى هدوء وبعدين يدخل ينام
والسلام عليكم ورحمة الله وبركاته
بس خلاص شوفتوا سهلة ازاى
يعنى مش مستهلة بئا الاكتئاب والحزن على تأخر الجواز
انت اصلا مش فايتك كتير
انت لما تتجوزى هتكتشفى ان الجواز كله عبارة عن ساعتين فى اليوم
بذمتك الساعتين دول يستاهلوا بئا الوش المعمول دة كله
بصوا بجد عشان اكون حقانية فى اوقات بتعدى فعلا بتكون حلوة وتخليكى تحسى ان اللحظة دى تساوى العمر كله
لكن برضه ارجع اقولك انها لحظات نادرة ومابتتكررش كتير
حتى الموضوع اياه...
فى الاول هيكون كتير اوى وبعدين هيقعد يقل يقل لغاية ما يتحول الى الاعياد والمناسبات القومية
ودة برضه لانه بيكون برة طول الوقت والحاجات دى عايزة مزاج
ماهو مش معقول فى الساعتين دول من ساعة ما ييجى من برة لغاية ما ينام هيتعشى وياخد شاور ويريح من تعب اليوم ويرغى معاك شوية وكمان يبئا لسه فى وقت اوفى دماغ انه يعمل موضوع زى دة
ولما تقوليله انت بتوحشنى وانا مش بلحق اشوفك او انا نفسى تقعد معايا وقت اطول
هيرد عليكى بقصيدة ماهو كله عشانك ياحبيبتى وهو يعنى انا بعمل ده كله عشان مين
يعنى يا ادم تسيبنى لوحدى اكلم نفسى طول اليوم عشان خاطرى
تسيبنى احس بوحدة فظيعة طول الوقت عشان خاطرى
طب تصدقوا بالله ، انا ساعات من كتر ما بيوحشنى بحس ان انا قلبى بيوجعنى
ماحدش بئا يقولى املى وقتك واشغلى نفسك لان اصلا انا وقتى مليان وعندى شغلى وكله تمام
بس مش ممكن حاجة تملا مكانه او تعوض غيابه
اعمل ايه ... بحبه يا بابا عااااااا
هناك 29 تعليقًا:
سبحان الله وكانى على
موعد مع جواب لسؤال
بسأله لنفسى الايام دى
افادك الله ياحبيبتى
كده انتى جاوبتينى
من غير ما اسالك
انا جيت ولبيت نداء الزياره زي مطلبتي
اولا السلام عليكم
ثانيا حكاية ظروفنا زي بعض ديه اشك فيها جدا
لانك متجوزه وانا هطلق قريب جدا
وانا فعلا كنت بعاني نفس المعاناه في البوست بتاعك ده
وحولت اتكلم كتير
بس الفرق ان جوزك بيغيب في شغله
لكن انا زوجي الحالي مكنش بيغيب في شغله وبس
ولكن اصحابه وعيلته واخدين الباقي من اليوم بعد الشغل
وميفضلش ليه انا وبنتي إلا السلام عليكم
وعليكم السلام
وغير ده كله علي حكاية الموضوع ايه
تصدقي انه بيشتكي من قلته مع انه دايما بليل تعبان من المشاوير ونفسه يقول لسرير ان فين ياحبيبي
لكن الشماعه زي مانتي عارفه
لازم يكون فيه شماعه
وللأسف انا شمعته اللي بيعلق عليها شكوته
وحسبي الله ونعم الوكيل
أشتغلي لو ما بتشتغليش
وكما قال الحكيم الجامد أوي
الحب في القلب زي الرز في الكوسة
فية حاجة اسمها التعود أقوى واهدا كتير من الحب يعني رغم العيوب ما تقدرش تغير دة بعيوبة كويس
وبعدين يا بنات ( نفاق) انتوا صابرين على البلا سبعة وعشرين سنة اصبري على راجلك شوية ولا ما يشبهش
احسن حاجة الازواج يعملوا امن مركزي وامن دولة للزوجات
أما نشوف اخرتها اية معاكو
مبروك عالمدونة عقبال الملك اصلها ايجار جديد صح
احب الكاتب الرائع بولو كويلو
والذي حل تلك المشكلة عندما قسم اوقات عامه الى
وقت جماعي يلتقي فيه مع كثير من الناس
ووقت آخر يقضيه مع مجموعة خاصة
ووقت عائلي
ووقت فردي ينفرد فيه مع نفسه
تحبيه ويحبك
عليكما أن تصلا لقرار مشترك بأن يكون لكم وقتا عائلي خاص جدا وان تلتزما به كالتزامكما بالعمل
اتمني لكما حياة سعيدة دافئة
سمراء
عزيزتى
هما ساعتين وحشين
فى ناس تتمنى ساعه مع حبيبها
ومش طيلاها
وكمان الاولاد ان شاء الله هيملوا فراغها وهتدور على حد يساعدها
تحياتى
سلام
بما انى لسه متجوزتش احب اقولك ان البنات واعيين بجد للى انتى بتقوليه
انتى فاكرانا طماعين احنا بس عايزبن شوية اللحظات الحلوة النادرة اللى بتحسس الواحدة انها ملكت الدنيا وما فيهاشوية لحظات نعيش عليها باقى اليوم او باقى العمر
مستنيه جديدك
هههههههه والله عندك حق انا من حزب اللى عايزين يتجوزوا بس شايفة اللى حواليا بيشوفوا الويل مع رجالتهم بقول الحمد لله خلينى كده احسن انا الهم يركبنى ليه بدرى
بس ااقولك حاجة الست الذكية هتقدر تخليها يهتم بيها من جديد
التغير والتجديد فى الحياة وفى شكلك كل فترة بيرجع الحب تانى حاولى تتجديدى فى حياتكم لان الروتين بيسبب الملل وكلميه بصراحة انك نفسك يكون معاكى ومش يهملك بدل ما تفضلوا ساكتين ومش هتحلوا المشكلة بالعكش هتزيد اكتر
تصدقي لو قعدلك في البيت حتزهقي منه
يا بنتي دول ينطبق عليهم المثل
لا احبه و لا اقدر على بعده
قطيعه كلهم عجينة واحدة
هههههههه
اوروفوار
norahaty
الحمدلله ان كلامى كان فيه فايدة ليكى
وهفكرك كمان بمثل قديم بيقول " خدى اللى بيحبك وماتخديش اللى بتحبيه " المثل دة طلع صحيح جداااااااا
لا اعرف
انا حاسة بيكى جدا بس الطلاق دة خطوة خطيرة جدا
ياريت ماتتسرعيش وتفكرى تانى
اصلا يعنى الطلاق هيفرق فى ايه؟؟
خليكى احسن وربى بنتك واقفلى بابك عليكى
وربنا يوفقك يارب
مصرى جدا
شكلك ماقرتش البوست للاخر
لان اخر سطرين فى البوست بيجاوبوا على كلامك
على العموم الموضوع بيحتاج ادم حساس وقلبه كبير عشان يحس باوجاع ليلى
سمراء
شكرا جدا لتعليقك
انا هعرض عليه واشوف رأيه واحكيلكو الرد فى بوست تانى
احساس لسه حى
عندك حق
بس دة كلام العقل
اما القلب ... فليه كلام تانى خااااالص
عصفورة من الشرق
عند حق بجد
واللحظات دى هى الى مصبرانى دلوقتى
ايوشة
حلو التفاؤل دة
كلنا كنا بنقول كدة فى الاول
ههههههه
استمرى يا بنتى
اول زيارة لى ياجمييل
شكلك كده متجوزة جديد؟؟ صح ولا لأ ؟؟
اختك بقالها 12 سنه وشفت من المنقى خيااااار......وحياتك زهقت من كتر الكلام اللى باقوله وبيطيييييييير فى الهواااا...
كلهم نسخه واااحده ...ده اكييييييييييد.....بس لو انت بتحبيه ...استحمليه وامرك لله ...
اما الموضوع اياه ده فكتره بيزهق...
لانه هيبقى تقضية واااجب...وبسرعه علشان عايز ينااام...
والبعد شويه بيعمل شوق ليكم انتم الاتنين...حاولى تختارى اوقات مناسبه علشان ماتضايقيش من رفضه...
لان الرجاااله دايما بيفكروا فى الموضوع ده اكتر من الستات صدقينى
بس المشكله ان المجهود عليهم اكتر ...فبيكسلوا ...بس..
لانه متأكد ان وقت لما يعوزك ..هيلاقيك ...فخليها احسن لما يكون مرتاااح..
انت لسه العمر قدامك كتيير ان شاء الله مع جوزك....وان شاء الله ربنا يرزقك بابن او بنت يسلووكى...
تحياتى ياجمييل
ومستنيه زيارتك
سلااااااااااااااام
طهقانة
يا اهلا يا اهلا
معقول ست طهقانة بنفسها منورة المدونة عندى
اما بخصوص لا احبه ولا اقدر على بعده
فبصراحة انا ماجربتش
يقعد هو بس وانا اوقلكو رأيى ايه
بنت الغربة
انافعلا بحبه عشان كدة مستحملة حاجات كتير
اما الموضوع التانى فاحنا متفاهين فيه والحمدلله
لكن طبعا مش زى الاول
عشان زى ماقلت فى البوست هو دايما مشغول وبييجى البيت تعبان
أعتقد فى موضوع شائك ومتشعب, كالعلاقة بين الرجل والمرأة, فأنه من الخطأ التعميم فى الأحكام, ففى النهاية أصابعك ليست مثل بعضها
لاحظى, اننا لو استخدمنا نفس القياس على الجنس الناعم, فسيكونن ثرثارات, مسرفات, لا يشغلهن الا فى التافه من الأمور
تقبلى تحياتى
حازم سويلم
انا مش بعمم
انا بس بفهم البنات اللى لسة ماتجوزوش عشان مايتصدموش زيى بعد الجواز
ويقعد الراجل يحاول يوصلها وعايز يتجوزها وبيحلم باليوم اللي تبقى مراته فيه
ولا حد يقوله متبصلهاش ولا حد يقول متقعدش معاها لوحدكم
ويعاند اهله علشانها ويتحمل مشاكل اهلها
ويتحمل مطالب الجواز ويتقدم ويتجوزها وبعد كده يبقى بيحلم بالزوجه اللي بيشوفها في قصص الخيال العلمي
تحبه وتحترمه وتطيعه وتاخد بالها منه وتعيشه ملك
بس يتفاجأبراحده لسه عايشه ايام بيت ابوها
جايه تتفسح تقريبا
لا عارفه يعني ايه مسؤليه ولا غيره
وحتى الحاجات اللي بيحلم بيها واللي كده كده يعني
في اول يومين بتبقى متجاوبه وبعد اسبوع واحد تلاقيها بقت زهقانه ومش مستعجلين يا حماده هو انت لازم كل يوم
ويكتشف ان الحياه م مذهله زي ما كان بيحلم
هي كل تفكيرها في امها والمطبخ اللي مبتعرفش تعمل فيه كوباية شاي
تقدري تقولي بيتصدم في طفله لسه منضجتش
عموما الزواج عند الطرفين بيرسى على خيبة امل في حالات كتير
خاصة اللي بيرسموا على انهم يعوضوا فيه كل اللي فاتهم في حياتهم
سلاااااااااااااااااااااااام
على فكرة الموضوعات دى أتنبأ لها بإنها هتكون سلسلة جميلة جدا
ماشي
والعكس كمان
ادم في عرض جاة النبي عايز ليلي حساسة وقلبها كبير
يعني الموضوع مشترك
طالما لا يوجد عيب جوهري يبقا كويس كلة يتصلح مع الوقت
الموضوع نسبي تماما بمعني ان احساسك ده مش لازم يكون هو القاعده وبمعني اخر
كل بيت مقفول علي حكايات واحداث ومعاناه مختلفه تماما عن الاخر
يعني فيه بيوت بتعاني من مشاكل ملهاش حل زي مثلا عدم القدره علي الانجاب
وبيوت تانيه بتختلق لنفسها المشاكل والمعاناه بالرغم من عدم وجود مشاكل حقيقيه
مش عايز اطول بس فعلا الموضوع نسبس تماما وبعدين ممكن سؤال ومن غير زعل ؟؟
عمرك ما سمعتي عن الزوجه النكديه
او الرجل النكدي
دول مش بيناموا الا علي النكد
الشنكوتى الكبير
ماهو ادم برضه بيفضل يدور على ليلى طول عمره وفى الاخر يحطها فى البيت ويقفل عليها ويطلع برة بئا عشان يشوف حياته وينساها خاااالص
هودة الجواز برضه ياناس
احمد الصباغ
شكرا على مرورك وياريت تزور مدونتى بانتظام ودايما تقولى رأيك فى الجديد
مصرى جدا
فعلا الموضوع متبادل والاتنين محتاجين يلاقوا الحب والحنان عند الطرف التانى
عشان يتحقق السكن اللى ربنا قال عليه
ebn roshd 777
طبعا مفيش بيت زى التانى وكل واحد عنده مشاكله
انا بس بعرض حالة موجودة وبتعانى منها ستات كتير
مش انا لوحدى
ليلى
حبيت المرور والتعليق عندك والتهنئة ببلوجك المميز
بالنسبة للموضوع مش عارفة، ممكن فعلا ضغط الشغل ياثر على العلاقة بس الويك اند يبقى فرصة لتعويض انشغالات الاسبوع والخروج او مجرد تقعدوا مع بعض، بس ضروري ان الاحساس بالرغبة فى تعويض انشغالات الاسبوع تبقى مشتركة بينكوا، يعني يكون هو كمان حاسس ان الشغل واخد منه حاجة غالية ومهمة وبالتالي يبقى على استعداد فى ايام الاجازة لتعويض الوقت ده
واطيب تحية
إرسال تعليق