انا مش هابدأ كلامى انى اتأخرت عليكو والحاجات دى لاننا اتفقنا قبل كدة ان الحاجات دى حاجات رفيعة ماتستاهلش اننا نتكلم عنها؛ بس الحقيقة ان الفترة اللى فاتت كانت مليانة احداث كتيرة جدا جدا جدا وفى نفس الوقت عدم رغبة منى فى الكلام عن اى شئ، يمكن من كتر الضغط ولانى لو كتبت كانت هتكون بوستات مأسوية وانا مش بحب الغوامق
الأحد، 5 يوليو 2009
انا جيت
انا مش هابدأ كلامى انى اتأخرت عليكو والحاجات دى لاننا اتفقنا قبل كدة ان الحاجات دى حاجات رفيعة ماتستاهلش اننا نتكلم عنها؛ بس الحقيقة ان الفترة اللى فاتت كانت مليانة احداث كتيرة جدا جدا جدا وفى نفس الوقت عدم رغبة منى فى الكلام عن اى شئ، يمكن من كتر الضغط ولانى لو كتبت كانت هتكون بوستات مأسوية وانا مش بحب الغوامق
الخميس، 2 أبريل 2009
مصر و زامبيا
لقيت ادم بيقول :ياااااه هى الساعة كام دلوقتى؟
قولت : ليه؟
قالى اصل فى ماتش مهم اوى
قلت: مهم ازاى يعنى ؟ هيجى فى الامتحان
بصلى كدة بصة معناها جتك نيلة فى جهلك وقال : لا دى تصفيات كاس العالم
وبصراحة انا كنت مهتمة بالبطولة الافريقية الاخيرة وفعلا كان المنتخب بيلعب حلو
وكمان انا قلت حاجة تبسطه وتشده شوية بدل ماهو محبط كدة اليومين دول
فقلت : خلاص اوك. نتفرج على الماتش
بصوا احنا كنا ساعتها بناكل وكنا جايبين علبتين كشرى ومظبطين القاعدة
وبعدين انتو عارفين ان الرجالة اصلا بياكلوا برجليهم فكانت القاعدة كلها صلصة
فانا طلبت منه انه يقوم يغسل ايده عشان طقم الانتريه مايتوسخش
وهو مش راضى ويقول فى الهاف تايم
قلت له هتقعد ملحوس كدة لغاية الهاف تايم.لو سمحت قوم اغسل ايدك
وكلمة من هنا على كلمة من هنا
اتخانقنا ( كالعادة ) وفى نفس الوقت اللى احنا كنا بتخانق فيه ... دخل اول جون - موسيقى تصويرية
قعد بئا يزعق و يطنطط عشان انا ضيعت عليه فرحة الجون وانى نكدية
بصراحة اصلا هو لو كان قام غسل ايديه بدل الخناق دة كان لحق الجون وماكنش عاكنن علينا كدة
بعدين اصلا الانسان من المفترض انه نضيف
مش اننا محتاجين نتخانق ونزعق عشان الباشا يتكرم ويتفضل وينولنا شرف غسيل ايدين معاليه
ما علينا ... المهم
عدينا الليلة ولمينا الدور وقلت يا واد طنش خالص وكملنا الماتش
وفعلا اصابنى المنتخب الوطنى بكل انواع الضغط والسكر وشلل الاطفال
وبجد فكرونى انا ليه مش بحب الكورة ومش بحب اتابعها ؛ لان اللى بيتابع الكورة زى اللى بيتابع اخبار السياسة،
بيتشل وبيتحرق دمه على الفاضى
بصراحة انا شوية كدة وسخنت ودخلت فى موود الماتش وبئيت بنفعل اوى وكمان باقولهم ازاى يلعبوا وازاى يباسوا لبعض ولا اجدعها مشجع ولا اجمدها ناقد
طبعا فى الاخر اتناكد عليا واتعكننت من الاداء الضعيف جدا بتاع المنتخب
كمان انا قولت لما هما بيعملوا كدة ادام زامبيا ، امال هيعملوا ايه لو وصلوا لكاس العالم ولعبوا مع فرنسا وايطاليا
دى هتبئا فضيحة
وربنا يستر على ولايانا
بس بجد
قعدتى انا وادم مع بعض وقت الماتش
والجو اللذيذ اللى كان فى البيت واحنا عمالين نتناقر ونوجه اللاعيبة ونتشل ونتغاظ مع بعض
فعلا كان وقت حلو اوى
خلاص الماتش خلص
وفضينا الليلة
وكملنا اليوم عادى وقعدنا واتعشينا ودخلنا نمنا
وخلينى اقولكو شوية عما يدور وراء الابواب المغلقة
احنا اول ما اتجوزنا كنا بنحضن بعض واحنا نايمين
كنا بنعمل اشكال سيريالية عجيبة فى التداخل واللامسافات وفعلا ماكنتش تقدر تحدد بالظبط جسمى من جسمه
وطبعا دوام الحال من المحال
شوية شوية المسافة بدأت تبعد لحد ما بئا هو بينام فى طرف السرير وانا بنام فى الطرف تانى وكأننا نايمين فى سريرين منفصلين
بس فى اليوم دة
انا طبعا نمت قبله وسبته بيتفرج على التليفزيون
و لما دخل ينام حسيت بيه حاضينى اوى وضامنى جامد
بجد انا حاسيت براحة جميلة اوى وحسيت هو اد ايه واحشنى واد ايه انا بحبه
بجد الحضن دة فرق معايا اوى
ربنا يخليك ليا يا حبيبى وربنا يهدينا لبعض
وبركاتك يا حسن شحاتة
الأحد، 22 مارس 2009
ادم وعمايله
اسفة لانى تأخرت فى الكتابة بس دة لظروف سعيدة جدا ... انا اشتغلت يا منز
الحمد لله بعد طول بحث عن وظيفة اخيرا ربنا وفقنى فى شغلانة كويسة اوى مع ناس طيبين ومحترمين والحمد لله رب العالمين
بس يشاء ربنا انه فى نفس الاسبوع اللى اشتغل فيه ، ادم بسيب شغله ويقعد فى البيت
شفته حظ اكتر من كدة
تعالوا بئا احكيلكوا عن رد فعل سى ادم عن شغلى
اولا انا بشتغل من 9 الى 5 بس عشان الشوارع فاضية والمواصلات سهلة ففى الحقيقة انا بشتغل من 7:30 الى 6:30
يعنى تقريبا 11 ساعة برة البيت
قوم بئا لما اروح ايه اللى يحصل ... الاقى سى ادم مش طايق انى رجعت و يقولى هما بيمشوكى بدرى كدة ليه ؟
وكلام كدة من اللى بجد يبان صغير لكن بجد هو جارح جدا ويضايق
وبيعمل ايه كمان سى ادم
يقعد طول اليوم فى البيت ، و ييجى قرب ميعاد مرواحى يخترع اى مشوار عشان ارجع وهو مش موجود ، ويفضل برة لغاية قرب ميعاد نومى . يعنى تقريبا من يوم ما اشتغلت ماشفتوش ساعتين على بعضهم
دة غير العصبية والنرفزة والاسلوب الوحش
انا عارفة ان الحالة اللى هو فيها دى سببها انه بطل شغل ، ولسوء الحظ كمان ان دة يحصل فى نفس الوقت اللى انا اشتغلت فيه
بس انا ايه ذنبى فى النكد والعكننة دى كل يوم
بجد ادم ضيع على فرحة الشغل الجديد
وانا اصلا لسة جديدة والمفروض اثبت نفسى
بس بسبب الجو اللى هو عامله انا لا عارفة انام ولا عارفة اركز ولا لى نفس اعمل اى حاجة
يعنى دة يرضيكم برضه
انا لما كنت قاعدة وهو بيشتغل ، وكان بجد ساعات الشغل بتاعته مبالغ فيها جدا بمعنى انه كان فعلا بييجى البيت عشان ينام وبس
انا برضه كنت بعامله كويس وكنت مريحاه
دلوقتى شوفوا هو بيعمل معايا ايه
طب بلاش دة كله
احكيلكو موقف تانى
يوم 20 مارس المفروض انه كان ليه معزة خاصة عندنا
لان فى اليوم دة يكون فات سنة بالظبط على خطوبتنا
ودى اول مناسبة تعدى علينا والمفروض يكون ليها احتفال خاص . انشالله حتى نتعشى سوا ونقعد مع بعض شوية
وكمان صادف يوم جمعة يعنى اصلا ماوراهوش حاجة
بس اللى حصل ان سى ادم افتكس كدة اى خناقة وعمل مأموص
وفضل واخد جنب لغاية ميعاد الصلاة وبعدين نزل غطس ومارجعش الا بالليل
قمت انا بئا عملت ايه؟
فضلت هـــــــــــــــادية ، ولا الهوا
وكان فى حفلة فى شغلى القديم بمناسبة عيد الام فروحت الحفلة دى وقعدت مع صحابى ، وقعدنا نضحك ونهزر وغيرت جو شوية بدل القرف اللى انا فيه
وبعدين روحت الساعة 9:30
قعدت شوية وبعدين دخلت نمت عشان اصحى بدرى
بس
ولا اديته اهمية
تخيلوا بئا هو عمل ايه؟
تانى يوم الصبح ، لقيته عمال يجر ناعم ، وكلمنى فى الشغل مرتين ، ورجعت البيت لقيته موحود لاول مرة من يوم ما اشتغلت
بجد سبحان الله عليك يا آدم
اما صحيح الرجالة دول عاملين زى طابع البوسطة ، تتفى عليه يلزق
بس انا برضه ماهنش عليا ولما لقيته اخد المبادرة الاولى قمت انا كمان ماكسفتوش وعملتله غدوة معتبرة وكلمته عادى.
والله العظيم انا لو ماكنتش بحبه انا كان جالى الهسهس من زمان
الأحد، 8 مارس 2009
موقف و بدلة واغنية
لو كنت ولد حتى لو ليوم
كنت هقوم من السرير الصبح
والبس اللى انا عايزاه
واروح اخرج مع صحابى
واعاكس البنات
واهيس مع اللى تعجبنى
وماحدش هيمسكها عليا
عشان الكل هيشجعنى
لو كنت ولد
كنت هفهم
ايه احساس انك تحب بنت
والله كنت هكون راجل احسن
كنت هاسمع لها
لانى عارفة اد ايه بتوجع
لما تخسر حد انت عايزه
لانه بيعتبرك من المسلمات
وكل اللى بينكو يضيع
لو كنت ولد
كنت هاقفل التليفون
واقول انه بايظ
عشان يفتكروا انى نايم لوحدى
كنت هاحط اولوية لنفسى
وانا اللى احط القواعد
لانى عارف انها هتكون مخلصة
ومستنيانى لما ارجع البيت
لو كنت ولد
كنت هافهم
ايه احساس انى احب بنت
والله كنت هاكون راجل احسن
كنت هاسمع لها
لانى عارفة اد ايه بتوجع
لما اللى بينكو يضيع
عشان بيعتبرك من المسلمات
الوقت اتأخر انك ترجع
وتقول انها غلطة
وتفتكر انى هسامحك بسهولة
وانى هستناك
انت غلطان
بس انت مجرد ولد
صعب انك تفهم
انت مش فاهم
ايه احساس انك تحب بنت
فى يوم هتتمنى لو كنت راجل احسن
انت مش بتسمع لها
ومش بيهمك اد ايه بتوجعها
لحد ما تخسرها
عشان بتعتبرها من المسلمات
وكل اللى بينكو ضاع
بس انت مجرد ولد
السبت، 28 فبراير 2009
آدم وأم آدم
قامت الست لما لقيتنى بعيط قامت وحضتنى وقعدت اعيط فى حضنها زى البيبى اللى بيعيط فى حضن امه
وسمعت منى لحد ما ارتحت خالص واعصابى هديت
و بعدين اتكلمنا بهدوء كلنا مع بعض وشوفنا ازاى نتقابل فى النص ولاقينا حل وسط يرضينا احنا الاتنين
وماسبتناش غير لما خليته يقوم يبوسنى ويوعدنى ان يوم الجمعة دة بتاعى لوحدى يقضيه كله معايا