انا مش هابدأ كلامى انى اتأخرت عليكو والحاجات دى لاننا اتفقنا قبل كدة ان الحاجات دى حاجات رفيعة ماتستاهلش اننا نتكلم عنها؛ بس الحقيقة ان الفترة اللى فاتت كانت مليانة احداث كتيرة جدا جدا جدا وفى نفس الوقت عدم رغبة منى فى الكلام عن اى شئ، يمكن من كتر الضغط ولانى لو كتبت كانت هتكون بوستات مأسوية وانا مش بحب الغوامق
بس عموما يلا حصل خير ... ادينى رجعت اهو.
ايه بئا اللى استفزنى بعد الفترة الطيلة دى كلها انى ارجع ادون تانى؟
خلونى الاول احكيلكو انا كنت فين امبارح
انا امبارح كنت فى فرح واحدة صاحبتى
يا سلام ، هو دة الموقف الجبار اللى استفزك عشان تكتبى
بصراحة اه
لان صاحبتى دى بجد انسانة كويسة اوى وفعلا تستاهل كل خير وكانت مرتبطة بواحد بئالها كذا سنة بس كان فى مشاكل كتير بينه وبين عيلتها واتقدملها قبل كدة واتخطبوا فعلا بس من كتر الخناق بين اهلها واهله فسخوا الخطوبة وقعدت تكلموا من ورا اهلهالاكتر من سنتين لغاية ما اخيرا مشاكله اتحلت وظروفه اتحسنت شوية وقدروا يرجعوا لبعض تانى
وبجد سبحان الله كل جاجة حصلت بسرعة؛ يعنى بعد ما جالها البيت تانى ووافقكو عليه اخيرا اتخطبوا واتجوزوا فى اقل من شهرين
وامبارح كان فرحهم
بجد لو تتخيلوا معايا اد ايه نظرة السعادة والفرحة اللى كانت فى عيونهم امبارح
فعلا قصة كفاح ولا ناهد وعلاء ... هههههههههه
لا بجد
هما صبروا كتير واستحملوا حاجات كتير ووقفوا جنب بعض وساعدوا بعض لحد ما حققوا حلمهم وبئوا مع بعض والدنيا كلها شاركتهم فرحتهم امبارح
فى احساس بئاجالى هو دة اللى حقيقى هزنى
صاحبتى دى وخطيبها اللى بئا جوزها دلوقتى كتبوا الكتاب فى نفس يوم الفرح
يعنى امبارح كان اول حضن ليهم
يااااااااااه
فاكرين الاحساس دة
احساس اول حضن
اول ضمة
اول مرة جسمه يلمس جسمك
احساس الرعشة والكهربا اللى بتجرى فى جسمك كله
احساس الشوق واللهفة اللى بيخلوا جسمك كله يتنفض بين ايديه
وكمان لما يروحوا بيتهم ويتقفل عليهم باب واحد وياخدها كدة بين دراعاته ويقولها يا مراتى وهى تسمعها من شفايفه لاول مرة
ولما بالليل يناموا مع بعض ( ماتفهمونيش غلط، اغسلوا مخكو من اى صراصير ) انا فعلا قصدى لما يناموا بجد ويروحوا فى النوم وهما حاضنين بعض كدة وجسمهم متحد ببعض.
بجد احساس لا يمكن يتوصف
عشان كدة انا عايزة اقول نصيحة صغيرة لكل بنت وكل ولد كمان
بلاش شقاوة واتلم واجل كل حاجة لبعد الجواز
بجد هتلائى كل حاجة ليها طعم احلى بكتير
اول حضن دة غااالى اوووى
اوعى تضيعيه على واحد مايستهلش
